Bilete: Kjersti og Tommy Turholm vil læra frå seg kjekke teknikkar og tilby ein introduksjon til grønlandsrulla på Sveholmen om ei dryg veke.

Helga 8. og 9. august arrangerer Havstril pk i samarbeid med Turholm kajakk to dagar med padlemoro på Sveholmen. Me startar rundt lunsj laurdag med leik og moro for ungdommen, etterfølgd av tur og navigasjon for vaksne. Me satsar på ein sosial samankomst med grilling på kvelden.

Sundag vert det mellom anna høve til rullekurs og kanskje å kjenna litt på bylgjer og forhold før det. Detaljert program kjem i løpet av helga.

Arrangementet er berre ope for medlemmar av Havstril. Du kan komma og gå når du følar for det!

This slideshow requires JavaScript.

Me fekk besøk av Tommy og Kjersti Turholm, som skal halda diverse kurs for oss i august, og dei vart med på padleturen. Eigentleg hadde aktivitetsleiar Trond planar om å padla langs Hundvåkøylandet, med allereie ved Barmen bygde havdønningane opp såpass utfordrande refleksar at me i staden padla ut mot Kalve for å vera meir i le.

Høg vasstand gjorde at me kunne dra ut i det grunne smettet mellom Inder- og Ytterøya. Sjeldan det går. Tommy coacha oss litt med teknikk under vegs, og me fekk òg drege ut gjennom sundet aust om Kalve. Fascinerande å dra ut der berre kajakkar og kanoar får plass.

Nokre av oss fekk logga nye trimpoeng, og Håkon lasta til og med ned applikasjonen og fekk registrert seg medan me låg ved inder- og Ytterøya.

Neste veke tek me utgangspunkt i ein annan stad enn Sveholmen for klubbturen. Utover hausten køyrer me truleg annankvar veke frå Sveholmen og den andre veka frå andre lokalitetar.

Torsdag 30. juli kl. 18:30 (i båtane til dess).

Følg lenken og meld deg på med deltek, eller send SMS 98874253.

Rettnok ein privat tur til Møkster og Fugløy, men verdt å dela nokre bilete til inspirasjon. To havstrilar tok motorseglbåt frå Drønen til Møkster, der det var flatt hav. Me padla ut Kuøysundet til Hekkingen, der me logga eit trimturpoeng. Deretter sette me kursen mot idylliske Plystrene. Ein flott plass til øytur og strandhogg, må seiast. Turkis sjø, sandbotn og ein og annan leppefisk som lyna unna der med padla.

Me sette baugen mot Hevrøy og det var framleis ganske rolege forhold, men derifrå til Fugløysundet var det etter måten mykje straumsjø, men me kom oss fram (trass i underteikne sin dårlege rygg) – deretter tok me oss inn til trimturpoenga, der me sette til livs matpakke og medbrakt kaffi og te.

På vegen attende var det veldig heftig straum ut Skoltafjorden, det var langt meir enn varsla på havvarselet på yr.no og me padla dermed rett mot hamna i Møkster, mest på grunna av dei nemnde ryggplagene. Likevel er det verdt å vera obs på for dei som vil padla til Fugløy. Kompetent turfylgje må vera med, og ein kan absolutt vurdera å unngå Skoltafjorden og kanskje finna ein dag utan vind, eller kanskje helst padla frå Våge eller Sørvik om ein hentar løyve frå Magnus til å bruka bryggja hans?

Uansett ynskjer me å minna på at deltakarar på trimturpoenga våre slett ikkje treng å ha ambisjonar om å ta alle eller fleirtalet av poenga.

Tekst: Trond H. Foto: Trond H./Morten D.

Etter å ha oppdatert medlemslista etter siste forfallsfrist og nytt introkurs med ti nye medlemmar, står for fyrste gong medlemstalet til Havstril padleklubb over 150. Me gler oss over den nye interessa for den gamle lidenskapen vår, og særleg at såpass mange av dei ferske medlemmane våre er med på klubbaktivitetane etter kurs.

Alle foto: André Hole.

Me kjem attende med fleire kurs, mest truleg i månadsskiftet juli/august.

This slideshow requires JavaScript.

Litt vind, ein god dash drag ved nordvestre pynten av Navøya gjorde sitt til at åtte havstrilar fekk ein litt adrenalinfylt start på torsdagspadlinga. Ina trødde til med rask kameratredning ved to høve. Sju sekundmeter kan gje litt rørsle, sjølv ein sommarkveld.

Me padla til dei små sunda som heiter Sengane på austsida av Navvågen, nokre av oss logga Trimpoenga våre, før me utforska nesten av vågen med krinkelkrokar innover mot friluftsområde. Me fann òg eit vindsurfebrett som me tok med oss eit stykke (har lagt ut på tapt, mista etc i Austevoll på FB) og fortøydde i eit tre.

Me tok deretter sjarmøretappen og bar kajakkane over smettet mellom den eine Navvågen til den hin, og kunne kosa oss litt i bylgjene som rulla inn frå Horgefjorden, særleg då me vende opp for vêret og kunne ri på bylgjene dei siste hundremetrane inn til Sveholmen.

Me padla i underkant av ti kilometer på litt under tre timar.

Neste veke kan det bli ein pause i organisert klubbpadling, men viss det blir kjem det uansett til å bli kunngjort på klubben si FB-side.

Sju havstrilar møtte til padling, som vart meir prega av nordsvinden enn me hadde håpa. I staden for å padla på nordsida av Hundvåkøy, tok me turen litt på kryss og tvers ved over Kalsvika. Me fann ei flott vik ved eit gamalt båtskjul ved Hille, der me gjekk på land og strekte på beina og tok oss ein bit av medbragt mat og drikke.

Det er særleg kjekt å sjå såpass mange ferske fjes på klubbpadlingane våre!

Basert på vêrmeldingane kan det vera at det vert onsdags- i staden for torsdagspadling til veka.

Me har handla inn desse kule drikkeflaskane i aluminium som deltakarpremie i årets Trimpoeng-konkurranse. Den har vore open sidan 1. juli, og er absolutt noko å hiva seg på no som den haustlege vêret ser ut til å verta pressa litt attende.

Hovudpremien ein middag for to ved gjestgiveriet vert trekt ut blant dei som har flest turar, eller går til den som har aller flest, når konkurransen er ferdig.

Info om  konkurransen og turmåla finn du her.

This slideshow requires JavaScript.

Nok ein gong smikkfullt padlekurs på Sveholmen. Ti ivrige sjeler fekk innføring i padlinga sine gleder av Trond H, assistert av Ingunn B. V. Omskiftleg vêr, men stort sett sol og nok vind til å halda knott og mygg unna, gav rammene for eit fint kurs vil me meina.

Introkurset er som mål i gje ei lett innføring i tryggleik og teknikk i kajakken, frå sitjestilling, framdriftstak, svinging, ombord- og ilandstiging i kajakken og tryggleiksaspekt som å komma seg trygt ut frå kajakken. I tillegg fekk deltakarane øva seg på kameratredning, før det vanka nyutskrivne våttkort til dei.

Neste kurs for vaksne er fredag 17. juli ettermiddag/kveld. Ved interesse/påmelding send e-post til info@havstrilpadleklubb.no eller SMS til 988 74 253.

Me har funne fram til 25 lokalitetar kring øyane me meiner du bør besøkja i løpet av sommaren. Det er Fugløy i vest til Saltskjersholmane i aust, det er Krossøy og Blænesøya. Konseptet er enkelt – du lastar ned Trimpoengapplikasjonen til mobilen sin, deretter melder du deg på Sommerturer i Austevoll 2020 og betalar deltakaravgifta på 100 kroner.

Du kan velgja å konkurrera med deg sjølv, eller sjå om du klarar å komma deg heilt til topps. Blant dei som klarar alle, eller flest turar, vil me ha ei trekking av ein middag for to på Bekkjarvik gjestgiveri. For alle som gjennomfører minst ein tur, ventar det ein flott deltakarpremie.

Trimpoengkonkurransen opna 1. juli.